مستحضرات وأدوات لا غنى عنها في شنطتك يوم الفرح.

لأي عروسة منتظرة بتسعى للحفاظ على تألقها وجمال اطلالتها يوم الفرح، شنطتك عنصر أساسي في يومك لازم يضم كل المستحضرات والادوات اللي تساعدك وتنقذك في المواقف المفاجئة. في المقال ده هنعرف سوا عن أهم الأدوات والمستحضرات اللي لازم مينفعش تنسيها في اليوم ده…

شنطتك يوم الفرح

ولأن أي عروسة بتحلم أن يوم فرحها يكون زى ما كانت بتحلم، لازم تعرفي تعالجي الأخطاء البسيطة اللي ممكن تأثر على اطلالتك وثقتك بنفسك في اليوم ده. شنطة الفرح لازم تكون معاكي وتضم كل اللي ممكن تحتاجيه علشان يومك يمشي بسلاسة وتكوني متطمنة.

محتويات شنطة الفرح من قطع وأدوات هتختلف من عروسة لأخرى حسب الإطلالة ومكان الفرح و وقته وغيرها من العوامل المؤثرة، لكن يوجه عام ممكن نقسم احتياجات شنطة الفرح ل:

• مستحضرات تجميل للمواقف السريعة والطارئة.
• مستلزمات الطرحة والحجاب والشعر.
• العطور ومستحضرات العناية.
• أدوات أخرى لأى موقف طارئ.

أهم ما تضم شنطة يوم الفرح

وفقاً لطبيعة فرحك وظروفه، وكمان اطلالتك ومكياجك، شنطتك لازم تضم اللي يخدم احتياجات اليوم سواء خلال استعدادك للحفل وأثناء الزفاف أو التقاط الصور وصولاً لوداع ضيوفك. تعالي نجهز سوا قائمة هامة لشنطة العروسة…

1.مستحضرات تجميل للمواقف السريعة والطارئة

عشان تحافظي على مكياجك خلال ساعات الفرح أو التصوير، ولأن مكياجك ممكن يتأثر بسهولة بلحظات الفرح والرقص والبكاء وتحية الضيوف، وجود مستحضرات تجميل سريعة معاكي شئ مهم. ومن المستحضرات دي:

روج من نفس اللون والنوع المُستخدم

وده لأن الروج من أسهل الحاجات اللي بتتأثر بسهولة سواء بالأكل أو الشرب خلال الفرح أو حتى التعامل الخاطئ. لذلك لازم يتجدد خلال الفرح بشكل صحيح.

بودرة مضغوطة لتقليل اللمعة

بعد ساعات من المجهود والرقص، ممكن تحتاجي تسترجعي اللوك “المات” لبشرتك وتقللي اللمعة الناتجة عن التعرق والحركة.

مناديل مبللة

ودي بتكون مهمة للغاية معاكي للسيطرة على أي تغيير طارئ على مكياجك أو أي حاجة تأثر على اطلالتك وشكلك. حافظي على وجودها في شنطة العروسة.

مرآة صغيرة

وطبعاً المرآة الصغيرة شئ أساسي في يوم الفرح علشان تقدري تظبطي أي شئ في مكياجك أو اطلالتك أثناء الفرح.

مزيل عرق

مهم للحماية مع الحركة والمجهود خلال الفرح

2.مستلزمات الطرحة والحجاب والشعر

عشان تحافظي على ثبات طرحتك وتسريحة شعرك أو حجابك، خلى معاكي الأدوات دي لأي مشكلة طارئة خلال يوم الفرح:

دبابيس اضافية للطرحة والحجاب

مع الحركة خلال الفرح أو جلسة التصوير، بتكوني معرضة أن طرحتك أو حجابك يفكو أو يحتاجو تعديل. خلي معاكي دبابيس إضافية تنفذك في الحالات دي وتثبت اطلالتك.

مشط صغير

تسريحة شعرك وارد تتأثر بشكل أو بآخر خلال الفرح. وجود مشط صغير معاكي مهم للسيطرة على أي تغيير طارئ خصوصاً لو الفرح في مكان مفتوح معرض للهواء أو الرياح.

بخاخ للشعر

بخاخ الشعر كمان مهم معاكي لتثبيت أي خصلة السيطرة على أي تأثير على شعرك خصوصاً في الجو الرطب.

3.العطور ومستحضرات العناية

ولأن من المهم تكون ريحتك جميلة وتكوني منتعشة خلال يوم الفرح، خلي معاكي في شنطة العروسة مستحضراتك الخاصة بالعناية والنظافة الشخصية.

عطرك المميز

خلي في شطنتك عطرك المخصص ليوم الفرح لاستخدامه وتجديده خلال اليوم.

كريم الترطيب

من المهم يكون معاكي كريم الترطيب الخاص بيكي خصوصاً في الجو البارد.

غسول الفم والفرشاة

النظافة الشخصية عنصر أساسي ليوم الفرح، وغسول الفم والفرشاة عنصرين هاميين خلال التجهيز للفرح. كمان خلي معاكي علكة لاستعمالها خلال الفرح.

4.أدوات أخرى لأى موقف طارئ

والقسم ده مش هيكون مشروط بشئ، لكنه معتمد على كل اللي هتشوفي إنك محتاجاه في يومك المميز. لكن بشكل عام ننصحك يكون معاكي:

إبرة وخيط: للسيطرة على أي قطع مفاجئ في فستانك أو طرحتك أو حتى فساتين حد من أحبائك.

فوطة صحية: تحسباُ لأي شئ مفاجئ خصوصاً لو دورتك الشهيرة قريبة من وقت الفرح.

قطعة شوكلاتة: مين مش بيحب الشوكلاتة ومدي تأثيرها على النفسية يوم الفرح.

زجاجة مياه: لو حبيتي تشربي في أي وقت خلال اليوم.

شاحن التليفون: مهم يون معكي شاحن موبايلك الخاص.

بطاقتك الشخصية: مهم يكون معاكي بطاقتك الشخصية لو احتاجتيها في أي ظرف خلال اليوم أو كان كتب الكتاب في يوم الفرح.

دواء مسكن للآلام: تحسباً لأي الآلام مفاجئة أو متوقعة.

ملابس داخلية إضافية: مهم يكون معاكي هدوم داخلية احتياطية.

وأخيراً، يوم الفرح هو يومك المميز. وبقدر تميزه بيكون القلق والتوتر مسيطر عليكي، لذلك حرصك على تجميع كل احتياجاتك مهم علشان تكوني مرتاحة وتستمتعي بيومك. افتكري دايماًإن قائمتنا هي خيارات مقترحة وممكن تضيفي أو تزودي عليها بقدر احتياجاتك وباختلاف طبيعة فرحك أو مكانه.

تقدري تعرفي أكثر عن نصايح الفرح:

جزمة العروسة | 7 نصائح عشان تختاري الأنسب ليكي.

الحمام المغربي للعرائس | 5 ميزات و 6 عيوب

مكياج العروسة | أخطاء شائعة تجنبيها للحفاظ عليه .