ركن القهوة في البيت إزاي تصمموه في عشكم الجديد؟

مين مبيحبش القهوة أو حتى الشاي بمشتقاتهم؟ سواء في بداية اليوم أو في آخره محدش بيقدر يستغنى عنهم، وعشان كدة لازم يكون في ركن القهوة في البيت.

واللي من خلاله تقدروا تحضروا مشروبكم المفضل في أي وقت وتشربوه وانتم مرتاحين.

وكل أدوات تحضيره جنب بعضها ومكان قعادكم وانتم بتشربوه مريح.

فمهما كان ذوقكم في مشروبكم، سواء كنتم بتشربوا القهوة التركي سادة أو محوج وعلى الريحة أو القهوة الفرنساوي أو اللاتيه.

أو مزاجكم في الشاي سواء الشاي المظبوط أو شاي بنعناع أو شاي بلبن، أياً كان ذوقكم.

فأكيد الحاجة اللي هتجتمعوا عليها إنكم عايزين تشربوا مشروبكم براحة وأناقة في بيتكم.

ويمكن إنكم تعملوا ركن القهوة في البيت من الصفر يجمع بين الحداثة في موضته وعمليته، وإنه يكون على ذوقكم، تعتبر مهمة صعبة شوية.

لكن احنا هنا في المقال ده حاولنا نجمع لكم أكتر النصايح اللي ممكن تفيدكم عشان تقدروا تحققوا المعادلة الصعبة دي بمنتهى السهولة.

فتابعوا معانا المقال.

مكان صغير يقدر يكفي:

حتى لو مفيش غير مكان صغير عندكم تقدروا تخصصوه عشان ركن القهوة في البيت فبرضه المكان ده تقدروا تستثمروه كويس.

هيكون كافي جداً لو خصصتم مساحة من واحدة من خزانات المطبخ، تكون في منطقة النص منها اللي يقدر حد يطولها وهو قاعد.

والمساحة دي تسبوها مفتوحة من غير درف وتعملوا في أرضيتها رخامة صغيرة تكون ظاهرة لبرة.

وبكدة ممكن تستغلوا رف منها في تخزين الأدوات اللي هتحتاجوها في تحضير مشاريبكم المفضلة زي الكوبايات والمعالق وعلب المشاريب نفسها.

أما الرف الأساسي اللي عليه الرخامة يبقى هو ترابيزة المشروب اللي عليه الغلاية وأي حاجة ممكن تحتاجوها بشكل فوري وانتم بتشربوا مشروبكم المفضل.

زي توستر صغير تحضروه فيه ساندوتشات الفطار مع المشروب، أو علب البسكويت المفضل ليكم.

وتقدروا تقعدوا في المكان ده كل يوم مع بعض وانتم بتفطروا، أو وانتم بتاخدوا مشروبكم المفضل في أي وقت من اليوم، وتفتحوا أي حوار يقوي علاقتكم وتكسروا بيه ملل اليوم.

ركن القهوة في البيت الأنيق:

أما لو عندكم مساحات واسعة في بيتكم؛ فده هيساعدكم إنكم تقدروا تصمموا الركن ده في بيتكم بشكل أكتر أناقة.

تقدروا تعملوا له مكان خاص بيه لوحده يكون عبارة عن دولاب كبير بعرض الحيط سواء في المطبخ أو في أوضة المعيشة.

ويكون قدامه ترابيزة كبيرة هي اللي هتقعدوا عليها، وفي الدولاب ده تقدروا تشيلوا كل أدوات تحضير مشاريبكم المفضلة.

وده بحيث إن فوضاها وزحمتها متعملش منظر مش لطيف يظهر للناس، لكن في نفس الوقت تقدروا تعملوا أرفف مفتوحة في الدولاب ده.

وفي الحالة دي هتستغلوها في إنكم تحطوا عليها حاجات فنية زي قطع الديكور والتحف الأنتيك، وبكدة تكونوا خلقتوا مساحة عملية وجميلة في نفس الوقت لروتينكم الصباحي وأوقات مشروبكم المفضل خلال اليوم.

عربية قهوة في بيتكم:

وحتى لو مفيش مساحة خالص عندكم فتقدروا توفروا عربية قهوة بديلة عن ركن القهوة في البيت.

وميزتها إنكم تقدروا تحطوها في أي مكان، وهتناسب أضيق مساحة من غير ما تسبب أي مشكلة خالص.

هي عربية تخزين بسيطة بأرفف تقدروا تخزنوا فيها علب مشاريبكم المفضلة، وتحطوا فيها الكوبايات اللي هتستخدموها في الشرب.

وتقدروا تاخدوها معاكم في أي مكان حابين تقعدوا فيه سواء المطبخ أو أوضة الليفينج أو أوضة النوم.

أو حتى لو عاوزين تشربوا قهوتكم أو شايكم في البلكونة وانتم سهرانيين مع بعض أو وانتم بتستقبلوا يوم جديد قبل ما تنزلوا على شغلكم.

وفي نهاية المقال نتمنى إننا نكون قدمنا لكم أفكار مفيدة تقدروا تستغلوها وانتم بتصمموا ركن القهوة في البيت اللي هتقضوا فيه أحلى أوقات طول اليوم مع بعض.

ونتمنى لكم حياة زوجية سعيدة تدوم للأبد وتملوا دايماً بيتكم بالفرح والحب والهنا.