رسايل مهمة لضيوف الفرح تفكرهم بأهم الخطوات

رسايل مهمة لضيوف الفرح هي خطوة لازم تحطوها في اعتباركم وانتم بتجهزوا لفرحكم عشان تقدروا تفكروا ضيوفكم بأهم الحاجات اللي لازم ياخدوا بالهم منها.

سواء ده كان عشان تفكروهم بالتاريخ أو من خلال تحديثات الموقع الالكتروني اللي ممكن تصمموه لفرحكم.

أو ممكن من خلال إيفنت على وسائل التواصل الاجتماعي أو جروب واتس خاص بفرحكم.

تجمعوا فيهم كل المعازيم اللي عزمتوهم على الفرح.

وده لإن مش من المفضل برضه إنكم تبالغوا في التواصل الشخصي المباشر مع كل واحد من المعازيم.

سواء كان على الإيميل الخاص بيهم أو رسايل الموبايل، لكن برضه مهم تتأكدوا إن كل المعازيم وصلتهم المعلومات المهمة.

سواء اللي انتم عايزينهم يعرفوها أو اللي هم هيكونوا محتاجينها وهم جايين على فرحكم.

وفي المقال ده هنحاول نعرفكم ايه أكتر رسايل مهمة لضيوف الفرح وامتى المفروض تبعتوها، وتقولوا فيها ايه؟

فتابعوا معانا المقال.

تذكيرهم بمواعيد حجز الإقامة في الفندق:

لو كنتم هتعملوا فرحكم في بلد تانية سواء برة مصر خالص أو محافظة غير محافظتكم جوة مصر.

زي إنكم تكونوا ناويين تعملوه في منطقة ساحلية أو سياحية زي إسكندرية او الغردقة أو دهب والعريش مثلاً.

أو حتى لو هتعملوه في بلدكم عادي بس فيه مجموعة من الضيوف اللي عازمينهم مقيمين في محافظات تانية.

فده معناه إن الضيوف دول ممكن يحتاجوا ينزلوا في فندق يباتوا فيه ليلة أو ليلتين، وعادة الفنادق اللي بيتعمل فيها الأفراح بتوفر أوض لمعازيم الفرح بأسعار مخفضة عن العادي.

ولكن برضه الخصومات دي مبتكونش متاحة طول الوقت وإنما لفترة معينة بعد الاتفاق على الفرح.

وبعد كدة الأوض بتبقى متاحة لأي حد من غير أولوية خاصة للمعازيم أو خصومات سبيشيال.

وعشان كدة من المهم إنكم تبعتوا رسايل مهمة لضيوف الفرح تفكروهم بالموضوع ده قبل أسبوع أو أسبوعين من انتهاء المدة المحددة للحجز الخاص بالمعازيم.

وممكن تبقى صيغة الرسالة زي:

مبسوطين جداً إننا هنحتفل معاكم قريب بفرحنا، ومتشوقين نشوفكم كلكم، وعشان كدة بنفكركم إن الميعاد النهائي لحجز أوض للإقامة في فندق الفرح (اسم الفندق) هو (تاريخ الميعاد النهائي)

فلو محتاجين أوضة للإقامة يومها ولسة محجزتوش أوضكم تقدروا تتواصلوا معانا أو مع الفندق على (طرق التواصل المتاحة)

ونفس الشيء برضه لو كانت الأوض المخصصة من الفندق للمعازيم بدأت تتحجز بسرعة وفي ناس لسة ملحقتش تحجز.

هيكون من المفيد إنكم تبعتوا لهم تأكدوا عليهم إنهم يحجزوا بسرعة عشان يلحقوا قبل الأوض ما تخلص.

رسايل مهمة لضيوف الفرح تأكد عليهم بالحضور:

في الفترة اللي قبل فرحكم هتبقوا بتبعتوا الدعاوي لكل المعازيم ومستنيين ردهم عشان تعرفوا العدد التقريبي على الأقل للحضور.

وده لإنكم هتحتاجوا تعرفوا العدد ده عشان تشاركوه مع منظم الفرح ويقدروا يحددوا على أساسه التجهيزات اللي هتحتاجوها.

وده سواء في الكمية التقريبية للأكل اللي هيتقدم في الحفلة مثلاً، وبرضه في إنهم يقدروا يحددوا أماكن الجلوس وعدد الكراسي والترابيزات اللي هيحتاجوها.

عشان كدة من المهم إنكم تبعتوا لضيوفكم تأكدوا عليهم بانهم يردوا ويأكدوا حضورهم للفرح قبل تلات أسابيع على الأقل من ميعاد الحفلة.

وفي الحالة دي لو فيه حد مردش خالص لا بتأكيد الحضور أو عدم قدرته على الحضور فمن الأفضل الاتصال به هاتفياً لإنه ممكن ميكونش شاف الرسالة.

وممكن صيغة الرسالة اللي هتبعتوها تبقى عبارة عن:

أخيراً بدأ العد التنازلي لأهم يوم في حياتنا! متشوقين جداً إنكم تشاركونا اليوم ده، فلو لسة مأكدتوش حضوركم للفرح ياريت تعملوا ده بسرعة.

وده عشان نقدر نعرف العدد النهائي للحضور ونوفر لكم أحلى ضيافة ومكان يتسع ليكم ويليق بيكم، هنستنى تأكيدكم وتواصلكم معانا لأي استفسار.

إرشادات الصحة والسلامة:

لو فرحكم في وقت انتشار مرض أو وباء معين (زي أيام الكورونا كدة) أو في إرشادات صحية أو سلامة معينة للمكان اللي هتعملوا فيه الحفلة.

فمن الضروري جداً إنكم تبعتوا رسايل مهمة لضيوف الفرح تبلغوهم بالتفاصيل دي، غير إنكم ممكن توضحوها كمان على دعوة الفرح.

والرسايل من النوع ده ممكن تبعتوها قبل ميعاد اليوم بتلات أسابيع تقريباً، وممكن تبعتوها مع الرسايل الخاصة بطلب تأكيد الحضور.

رسايل مهمة لضيوف الفرح بأخبار الطقس:

يمكن انتم هتكونوا مهتمين طول الوقت بمتابعة أخبار الطقس وأحوال الجو ليوم حفلة جوازكم عشان تظبطوا كل التفاصيل على أساسها.

لكن على الناحية التانية ضيوفكم مش هيكونوا مهتمين يتابعوا التفاصيل دي، وده ممكن يخليهم يتفاجئوا بحاجات ميعرفوش يتصرفوا على أساسها في نفس اليوم.

عشان كدة هيكون من المفيد إنكم تبتعوا لهم أهم التحديثات دي قبل يوم الحفلة بكام يوم عشان يعملوا حسابهم.

والرسايل دي ممكن يبقى فيها توصيات بالهدوم المناسبة مع حالة الجو، والأدوات اللي ممكن يحتاجوها معاهم بناءً على الطقس.

زي طارد الحشرات أو كريمات واقية من الشمس أو مظلات سواء للحماية من الشمس أو المطرة، أو إن أحوال الطقس هتطلب منهم وقت إضافي للسفر مثلاً، وهكذا.

وفي نهاية المقال نتمنى نكون وضحنا لكم ايه هي أكتر رسايل مهمة لضيوف الفرح ممكن يحتاجوا انكم تأكدوا عليهم بيها عشان يقدروا يحضروا فرحكم بسهولة وسلاسة.

ونتمنى لكم وقت سعيد مليان أفراح وانبساط وبداية حياة زوجية مليانة حب وود تدوم للأبد.