رسالة ترحيب لضيوف الفرح إزاي تكتبوها؟
رسالة ترحيب لضيوف الفرح هتحتاجوا تكتبوها سواء على الإيفنت اللي هتعملوه لفرحهم على مواقع التواصل الاجتماعي أو لو اخترتوا تعملوا موقع إلكتروني مخصوص لفرحكم.
فعلى الرغم إنكم أكيد عملتوا دعوات وبعتوها لضيوفكم إلا إن ده مبقاش كافي في العصر الحالي.
واحنا في عصر الانترنت والسوشيال ميديا بقت كل حاجة معتمدة أكتر على الظهور الإلكتروني.
ودعوات الفرح بشكلها التقليدي بقت مجرد تقليد كلاسيكي لازم نحافظ عليه عشان المظهر واللياقة.
لكن في الحقيقة إنها بتتحط في الدرج وتتنسي.
وعشان كدة مينفعش تعتمدوا على الدعوات الورقية في إنها تفكر ضيوفكم بميعاد فرحكم ومكانه أو أي ملاحظات انتم سايبينها عليها.
وده لإنهم غالباً هينسوها هي نفسها بعد دقايق من استلامها.
فالحل البديل إنكم تكونوا موجودين قدامهم طول الوقت على السوشيال ميديا اللي مش بيسيبوها من إيدهم.
وده من خلال إنكم تعملوا إيفنت لفرحكم على الفيسبوك مثلاً.
وتبعتوا دعوة عليه لكل ضيوفكم اللي حابين إنهم يشاركوكم يومكم المميز.
وبطبيعة الحال إن أول حاجة هيشوفوها أول ما يدخلوا الايفنت هو الوصف اللي فيه.
عشان كدة لازم يكون فيه تحية شخصية بسيطة ليهم تسيب أثر كبير عندهم.
يعني إيه رسالة ترحيب لضيوف الفرح؟:
الإيفنت ده مش هيكون مجرد مكان تعرضوا فيه صور خطوبتكم الجميلة.
لكن هيكون كمان زي منصة يقدر ضيوفكم من خلالها إنهم يلاقوا أي تفاصيل مهمة متعلقة بيومكم المميز.
وعشان كدة التحية اللي هتكتبوها في وصف الإيفنت هتكون أول حاجة يقراها ضيوفكم أول ما يوصلوا ليه.
ويمكن تبان لكم إن دي مجرد رسالة ترحيب لضيوف الفرح عابرة، لكنها في الحقيقة مهمة جداً.
وده لإن هي اللي هتحدد أجواء فرحكم؛ فعشان كدة ننصحكم بإنكم تخصصوا وقت تكتبوا فيه الرسالة دي.
وده بحيث تكون بسيطة لكن في نفس الوقت صادقة وليها معنى.
واحنا هنا في المقال ده هنحاول نساعدكم في صياغة الرسالة عشان نوفر عليكم وقت ومجهود مع اقتراب يومكم المميز.
فتابعوا معانا المقال.
أهم النصايح في صياغة الرسالة:
من أهم الحاجات اللي لازم تاخدوا بالكم منها وانتم بتكتبوا رسالة ترحيب لضيوف الفرح في الايفنت بتاعكم إن المعلومات تكون واضحة.
فلازم من الأول تشاركوا أهم التفاصيل المتعلقة بفرحكم ووتأكدوا إنها باينة كويس، زي تاريخ يوم الحفلة وتوقيت بدايتها والمكان بالتفصيل.
وفي نفس الوقت متكونش الرسالة طويلة بشكل ممل تخليهم يبصوا لها نظرة عابرة وميهتموش يقروا تفاصيلها، جملتين أو تلاتة بس هيكونوا كافيين.
ومن الحاجات اللي تاخدوا بالكم منها إن لغتكم في صياغة الرسالة تكون بسيطة، ملهاش لازمة خالص اللغة المزخرفة أو الاستعراض اللغوي في الكلام.
وده سواء باستخدام كلمات فصحى من باب الشاعرية مثلاً لكن ممكن كتير ميفهموهاش، أو برضه استخدام كلمات من لغات أجنبية ممكن متكونش معروفة عند الكل.
وبلاش تحطوا نكات أو دعابات ممكن متكونش واضحة للكل حتى لو متعودين تستخدموها بينكم أو في العيلة مثلاً.
فافتكروا إن الرسالة دي هيشوفها كل الضيوف واللي منهم زمايلكم في الشغل ومدرائكم أو ناس معرفة من بعيد.
فبالتالي هم معندهمش خلفية كافية عن الحس الفكاهي عندكم، وممكن ميقدروش يفهموا النكات أو الدعابات اللي هتضيفوها.
وبطبيعة الحال خلال تحضيركم لفرحكم وارد إن يكون في تحديثات جديدة طول الوقت، فهيكون من المناسب إنكم تضيفوا أي جديد يطرأ على الرسالة.
أو ممكن تحطوا ملاحظة إنهم يتابعوا منشورات الإيفنت عشان يعرفوا كل جديد أو أي تغيير يتضاف.
أمثلة على صياغة رسالة ترحيب لضيوف الفرح:
خلاص بقيتوا مستعدين لكتابة الرسالة فعلاً؟ تقدروا دلوقتي تقسموا الرسالة على تلات أجزاء رئيسية:
الترحيب بضيوفكم على الإيفنت، والتعبير عن حماسكم لفرحكم والاحتفال بيه، وتشجيعهم على قراية المعلومات اللي بتضيفوها أول بأول على الإيفنت.
وهنا احنا هنقدم لكم شوية أمثلة تقدروا تستعينوا بيها وانتم بتكتبوا رسالتكم الخاصة، ودي زي:
- شكراً جزيلاً على وجودكم معانا هنا في الإيفنت، احنا متحمسين جداً عشان نحتفل معاكم بيومنا المميز، استخدموا الايفنت ده عشان تعرفوا كل المعلومات اللي محتاجينها، وهنستنى منكم أي استفسارات.
- أهلاً بيكم في الايفنت الخاص بفرحنا، احنا مشتاقين جداً للاحتفال معاكم، وعلى الإيفنت ده هتلاقوا كل المعلومات اللي ممكن تحتاجوا تعرفوها عشان تستعدوا معانا ليوم فرحنا الكبير.
- بعد تأجيلات كتير أخيراً هنحتفل معاكم بفرحنا، تابعوا الإيفنت عشان تعرفوا كل المعلومات عن اليوم، بدأ العد… نتمنى نشوفكم كلكم في (التاريخ).
وطبعاً متنسوش تحطوا أساميكم في آخر الرسالة.
التفاصيل التانية اللي ممكن تحطوها على الإيفنت:
طبعاً الإيفنت مش هيكون مجرد رسالة ترحيب لضيوف الفرح وخلاص على كدة، انتم لازم تكونوا موجودين طول الوقت على الإيفنت.
وده عشان تضيفوا له حياة والناس تفضل متابعاه، ويبقى مصدر حقيقي فعلاً ليهم عشان يعرفوا كل التفاصيل المتعلقة بيوم فرحكم.
عشان كدة فيه أنواع كتير لبوستات ومنشورات تقدروا تضيفوها طول الوقت لحد ما يجي يومكم المميز وينتهي دور الإيفنت على كدة.
من المنشورات دي إنكم تحطوا بوستات بتفاصيل الطريق والسفر والإقامة لو كان فرحكم هيتعمل في بلد تانية غير بلدكم وبلد الضيوف الأساسية.
ولو عاملين تيمة معينة للفرح وحابين الضيوف يشاركوا فيها بلبس معين أو استايل معين هيكون من المناسب انكم توضحوا ده في منشورات الإيفنت.
ده غير إنكم ممكن برضه تحطوا منشورات تعبر عن قصة حبكم ورحلة تعارفكم ووقوعكم في الحب لحد ما وصلتوا لمرحلة الجواز.
وممكن كمان تطلبوا من ضيوفكم اقتراحات يشاركوا بيها في تفاصيل فرحكم، زي إنهم يقترحوا عليكم أغاني معينة، أو ديكورات وأفكار تنفذوها في فرحكم.
وفي النهاية نتمنى إننا نكون قدمنا لكم أفكار بسيطة في كتابة رسالة ترحيب لضيوف الفرح تشجعهم على التفاعل معاكم وإنهم يشاركوكم فرحتكم من كل قلبهم.
ونتمنى لكم فرح سعيد وبداية حياة جديدة سعيدة مع بعض مليانة بكل الحب والهنا.
هل محتوى المقال دة كان مفيد بالنسبة لك؟
نعم، مفيد!لا!
