ديكورات تصوير بوكيه الورد للخطوبة أو الفرح

كل رومانسية الصور بتظهر مع بوكيه الورد، لكن أحيانًا بنحتاج ديكورات تصوير بوكيه الورد لوحده أو مع دبل الخطوبة أو الفرح عشان تكون ذكرى خاصة.

ولإن كل تفاصيل الأيام الجميلة بنهتم بيها هنحاول نساعدكم في تصوير بوكيه الورد بشكل مميز تقدروا تحتفظوا بالصورة في برواز في مكان واضح أو تكون خلفية للموبايل.

ديكورات تصوير بوكيه الورد تناسب أي مناسبة

أيًا كانت المناسبة الخاصة يمكن تصوير بوكيه الورد بوضعيات كتير مناسبة ولطيفة جدًا.

تصوير بوكيه الفرح

لو التصوير لبوكيه الفرح هيبقى مناسب جدًا  يكون جانبه اكسسوارات الفرح زي أحذية العروسين والدِبل أو فقط الدِبل. وممكن يتصور مع خلفية كوشة العروسين، أو خلفيته تكون المعازيم لكن بشكل ضبابي. كل الوضعيات دي هتخلد ذكرى الزفاف وهتبرز جمال البوكيه في الوقت نفسه.

تصوير بوكيه الخطوبة

ودا لوحده من أهم الهدايا اللي العريس بيهديها للعروسة يوم الخطوبة، أهميته يمكن أكثر من الدِبلة نفسها. وعشان العروسين بيهتموا يشاركوا صور البوكيه والدِبل مع الأصدقاء وخاصة وسائل التواصل، فالصورة هنا هتكون مع ديكور الخطوبة في الخلفية. أو مع صينية الشبكة يكون عليها وبجانبه الدِبل. أو العريس والعروسة يتصوروا بالدِبل وهما ماسكين البوكيه.

ديكورات تصوير بوكيه الورد بتفاصيل بسيطة

قدر الإمكان نكتفي بديكورات بسيطة جنب البوكيه، لأنه هو نفسه شكله زاهي وبارز في الصورة. عشان كدا ممكن نصوره بتفاصيل بسيطة، منها على سبيل المثال:

• خلفية سادة وأرضية سادة والبوكيه في جانب الكادر فقط، وعند رفع الصورة نكتب جنبها جملة لطيفة.
• خلفية سادة وأرضية شفافة عاكسة للضوء مع وضع بوكيه الورد في الوسط هينعكس شكله.
• ورق جرائد أو ورق كتب قديمة وعليها البوكيه بشكل جانبي، وجانبه أظرف ورقية.
• أظرف ورقية وعليها ورقة بها جملة لطيفة وبجانبها البوكيه.

ديكورات تصوير بوكيه الورد مع إضاءة طبيعية

الإضاءة الطبيعية ليها تأثير كبير جدًا، وطبعًا نقدر نصور بوكيه الورد بوضعيات كتير مع الإضاءة الطبيعة:

• بفتح الشباك نقدر نستقبل ضوء طبيعي وعلى ترابيزة أمام الشباك نلتقط صورة في منتهى اللطافة.
• هنفتح الشباك تاني ويكون البوكيه على أرضية سادة، ونستخدم مصفاة يدخلها ضوء الشمس، تعكس على البوكيه والترابيزة ضوء وظل بشكل مميز جدًا.
• نسيب الشباك مفتوح وبوكيه الورد مع الديكور الجانبي، ضوء الشمس هيضفي تأثير روعة للديكور.

ديكورات تصوير بوكيه الورد مع الإضاءة الصناعية

هنستخدم إضاءة خفيفة قدر الإمكان عشان تضفي رومانسية على الصورة، ونقدر ننفذ صور بِعدة طرق منها على سبيل المثال:

• نستخدم فروع نور إضاءتها بسيطة جدًا، تلتف حول بوكيه الورد ويتصور في إضاءة متوسطة.
• نعلق فرع نور قوي خلف البوكيه ولكن نخليه وضوحه ضبابي ويكون التركيز على بوكيه الورد.
• توفير مصدر إضاءة جانبي زي أباجورة ونخلي البوكيه واضح بشكل جزئي مقابل إضاءة الأباجورة، وبينهم ديكور بسيط.
• ممكن كمان نستخدم قماش ستان رقيق وإضاءة خلفية رقيقة، ونلف الستان بشكل عشوائي وعليه البوكيه.

المهم قبل التصوير نجهز ديكورات تصوير بوكيه الورد اللي اخترناها، وتكون قدر الإمكان متماشية مع لون الورد. ولو مفيش أي ديكورات جاهزة نكتفي بصورة رقيقة للورد بشكل جانبي، ونضيف عبارة بعد كدا جنب الورد عند تعديل الصورة.

اقرأ أيضًا: وضعيات صور عرايس محجبات من غير لوكيشن تصوير.

اقرأ أيضًا: ديكورات تصوير لدبلة الفرح تقدروا تنفذوها بنفسكم بدون فوتوجرافر.