ديكورات الأفراح في الشتاء أفكار تساعدكم في اختيار تيماتها وألوانها

ديكورات الأفراح في الشتاء قليل ما حد بيتكلم عنها، وده يمكن لإن الموسم الشتوي عادة هو أقل أوقات السنة شعبية في حفلات الزفاف.

والمفروض ده يخلي التركيز والإبداع فيها أكتر لإن ضغط الشغل بيكون أقل على المنظمين ومختصين الديكور الخاص بالأفراح.

بس للأسف حفلات الزفاف الشتوية مبتاخدش حقها من التقدير الكافي.

على الرغم إن الموسم كله بيكون مليان إحساس بالسحر والبهجة خصوصاً في الأماكن اللي بينزل فيها المطر وأكتر لو كان تلج.

والأجازات اللي بتكون في فترة أعياد رأس السنة تقدر تضيف روح إحتفالية أكبر للأفراح اللي بتتعمل في الوقت ده.

وده يخليها تنشر جو الترابط العائلي في فرحكم، وتبقى فرصة لتجميع الأهل والأصحاب.

وتقدروا تختاروا الروح دي إنها تكون تيمة فرحكم؛ فتقدروا تختاروا تيمة الفرح تكون مستوحاة من حفلات أعياد الميلاد.

أما لو فرحكم في وقت مختلف عن رأس السنة؛ فممكن تبقى مستوحاة من بلاد العجائب الشتوية أو مظهر الغابات.

أو ممكن تقتبسوها من روح الحفلات الأسطورية اللي ظهرت في الفيلم الهوليودي غاتسبي العظيم ليوناردو دي كابريو.

كل دي أفكار تتناسب مع الأجواء الشتوية اللي هتكون حواليكم في الموسم ده.

فلو هتتجوزوا في الفترة ما بين نوفمبر ومارس؛ فانتم هنا في المكان الصح.

في المقال ده هنحاول نجمع لكم أهم الأفكار والمقترحات اللي تقدروا تستخدموها في ديكورات الأفراح في الشتاء وتقدروا تنفذوها بسهولة في فرحكم.

فتابعوا معانا المقال.

ألوان الزمرد والأزرق البحري في الديكورات:

ألوان الزمرد والأزرق البحري من أكتر الألوان المناسبة في ديكورات الأفراح في الشتاء وتقدروا تستخدموها بكل سهولة في ديكوراتكم المختلفة.

وهي مناسبة جداً لتيمات حفلات الزفاف التقليدية والكلاسيكية.

أو الأوبن اير لو هتعملوا فرحكم في حديقة البيت مثلاً أو مزرعة في الريف.

تقدروا تستخدموا الألوان دي في تفاصيل كتير زي لوحة الترحيب اللي هتحطوها على مدخل الفرح للضيوف.

فممكن تختاروا سبورة بلون الزمرد وتكتبوا عليها رسالة ترحيبية بالطباشير تدي مظهر دافي وحميمي للضيوف.

وكمان تقدروا تستخدموا الألوان دي في الهدايا التذكارية اللي هتوزعوها على ضيوفكم اللي شاركوكم فرحتكم.

فممكن تكون هداياكم ليهم عبارة عن شالات خفيفة باللون الأزرق البحري مناسبة لديكورات الفرح.

وفي نفس الوقت يقدروا يستخدموها ويتدفوا بيها لو حسوا بالبرد خلال الفرح.

ديكورات الأفراح في الشتاء بالأبيض والرمادي:

طبعاً الأبيض والرمادي ألوان مناسبة جداً للشتاء وأجواءه، فاللون الأبيض لو نشرتوه في كرات قطن في القاعة هيدي مظهر التلج.

وتقدروا تختاروا قطع ديكور مختلفة في القاعة تشارك في نفس المظهر زي الشجر اللي بيكون عليه كتل بيضا كإنه متلج.

ده غير إن الألوان دي بتمشي كمان مع لون فستان العروسة الأبيض؛ فتقدر تدخل معاه شال من الحرير أو القطيفة أو الفرو الأبيض يدفيها خلال الفرح.

وكمان تقدروا تدخلوا الألوان دي في المفارش اللي هتستخدموها على ترابيزات الضيوف، ولون الكوشة.

وقبل ده كله في إمكانيتكم إنكم تعلنوا عن اختياراتكم دي في ألوان الفرح وانها هتبقى ألوانكم الأساسية من خلال دعوات الفرح اللي هتبعتوها للناس؛ فتختاروا انها تكون بالألوان الأبيض والرمادي.

استخدام اللون البرقوقي في الديكورات:

على الرغم من إن اللون العنابي هو المنتشر أكتر في حفلات الزفاف الشتوية، لكن لو بتدوروا على شيء مختلف ومميز؛ فتقدروا تستبدلوه باللون البرقوقي.

وده مش بس تقدروا تستخدموه في ديكورات الأفراح في الشتاء، وإنما ممكن يدخل في مظهركم نفسه.

يعني مثلاً بدل البدلة السوداء التقليدية للعريس تقدر تختار بدلة بلون البرقوق وطيات الصدر فيها هي اللي سوداء.

وده هيديك مظهر عصري أنيق ويميزك عن أي حد تاني من صحابك أو الضيوف اللي عادة هيجوا بالبدل التقليدية المعتادة.

أما بالنسبة لعروستنا الحلوة فتقدر تدخل اللون ده في اكسسوارتها زي لون الورد اللي هيكون في بوكيه الورد اللي هتشيله مثلاً أو في ألوان المكياج اللي هتستخدمه.

ديكورات الأفراح في الشتاء في عيد الحب:

لو هتجوزوا في الشتاء فأكيد تاني أحسن ميعاد بعد فترة احتفالات وأعياد رأس السنة هو فترة أعياد الحب.

إن عيد جوازكم كل سنة يكون في عيد الحب، وتجددوا حبكم لبعض في كل مرة أكيد دي أكتر فكرة رومانسية في الدنيا.

وفي الحالة دي فالديكورات اللي هتستخدموها في فرحكم لازم تكون معبرة عن الأجواء دي، وطبعاً أكتر ألوان ممكن تعبر عن ده هي الأحمر والوردي.

وتقدروا تستغلوا ده في الديكورات بإنكم تستخدموا بوكيهات قلوب على الترابيزات بدل الورد الصناعي.

أما الورد اللي هيزين الكوشة أو أي مكان تاني هتستخدموا فيه الورد؛ فاختاروه ورد بلدي أحمر ووردي.

وكذلك المفارش على الترابيزات وأغطية الكراسي تكون كلها باللون الأحمر، حتى تورتة الفرح اختاروا انها تكون متزينة بألوان الأحمر والوردي.

وكمان دخلوا الألوان دي في مظهركم؛ فالعريس يقدر يلبس كرافات أو ببيون باللون الأحمر ويستخدم منديل جيب أحمر أو وردي.

كذلك العروسة تقدر تدخل ألوان الأحمر والوردي في مكياجها أو اكسسوراتها اللي ممكن تلبسها، زي الفيونكة الحمراء اللي بيحطوها الأتراك عادة في منطقة الوسط من الفستان.

وبكدة نكون وصلنا لنهاية المقال نتمنى إننا نكون فدناكم وقدمنا لكم أفكار ديكورات الأفراح في الشتاء اللي تقدروا تستغلوها بسهولة، وفرحكم يخرج بأحلى شكل ومظهر.

ونتمنى لكم فرح سعيد ومبهر، وبداية حياة جديدة مليانة حب وفرح وسعادة تدوم للأبد.