8 خطوات لتفتيح المناطق الحساسة قبل الفرح

تفتيح المناطق الحساسة حتفضل أكتر مشكلة للبنات والستات، وخصوصا للعرايس قبل فرحهم. النهاردة حنقولك سبب الاسمرار وازاي تفتحي المناطق دي حسب ميزانيتك.

ما هي المناطق الحساسة؟

في البداية المناطقة الحساسة تشمل مكانين وهما منطقة تحت الإبط، ومنطقة البكيني، ويتميز كل منهما بوجود ملايين من النهايات العصبية علشان كدة أُطلق عليهم هذا الإسم.

معلومة مهمة!

ممكن تتفاجئوا لو عرفتوا أن المناطق دي أصلا لونها مختلف درجة أو درجتين عن لون الجسم، وده شئ طبيعي بسبب زيادة إفراز مادة الميلانين وهي المادة المسؤولة عن لون بشرتنا.

أسباب اسمرار المناطق الحساسة

• وجود التهابات بسبب استخدام مواد تجميلية مش مناسبة مع نوع بشرتك.
• إزالة الشعر بطريقة غير مناسبة.
• حرق الجلد بسبب جلسات الليزر.
• ارتداء ملابس غير قطنية تسبب حكة والتهاب قوي.
• تناول المضادات الحيوية بكثرة لأنها تضعف المناعة وتسبب التهابات.
• المنتجات العطرية.

مشكلات إزالة الشعر من المناطق الحساسة

في حالة استخدام طريقة غلط على سبيل المثال: استخدام الشمع والسويت في منطقة البكيني وتحت الإبط بيحصل إحمرار والتهاب شديد ممكن يوصل لتكوّن جروح.

خطوات علاج اسمرار المناطق الحساسة

علاج الالتهابات 

ودي أول خطوة قبل استخدام أي منتجات للتفتيح، ودة عن طريق استخدام كريمات مضادة للالتهاب زي كريم بيتاديرم، وكريمات مضادة للبكتريا زي كريم كيناكومب أو ميكسديرم (والأفضل استشارة الطبيب قبل الاستخدام).

علاج الحروق

في بعض الأوقات بيكون فيه جروح بسبب استخدام وسيلة إزالة شعر غير مناسبة أو عمل جلسة ليزر بجهاز غير مناسب لنوع البشرة أو حصلك حساسية منه، فممكن تستخدمي كريم ميبو أو بيرناسورس لعلاج الحروق دي.

كريمات تفتيح المناطق الحساسة

كتير مننا بيلاحظ أن منتجات التفتيح بتزيد يوم بعد يوم، وبنكون حيرانين ومش عارفين نستخدم أي منتج، ولو استخدمتي الكريمات دي لازم تستمري عليها 3 شهور على الأقل لملاحظة النتائج، والكريمات دي على سبيل المثال:

1. Starville whitening cream.
2. Foldex cream.
3. Beesline whitening sensitive zone cream.
4. Bioderma pigmentbio sensitive areas.

استخدام مزيلات العرق

في السوق المصري منتجات كتيرة بتعمل على تفتيح منطقة تحت الإبط، والمنتجات دي على سبيل المثال:

1. Melatex roll on.
2. Starville roll on.
3. Infinity vitamin C roll on.

إزالة الشعر بطرق أحدث

كتير من الناس بيستخدموا الليزر لحل مشكلة إزالة الشعر، واللي أثبتت نتائج مبهرة، ولكن تكلفتها بتكون عالية شوية وخصوصا لو قررتي تشتري جهاز الليزر المنزلي. بس المهم تعرفي نوع الجهاز المناسب لبشرتك عشان ميحصلش أي التهاب.

تجنب المواد العطرية للمناطق الحساسة

حاولي تجنب استخدام صابون عطري وخصوصا عند الاستحمام، وحاولي تستخدمي صابون طبي على سبيل المثال: صابونة الجلسرين، وصابونة ديتول.

العادات اليومية 

1. ساعدي على تهوية المناطق الحساسة، وخصوصا في فصل الصيف مع زيادة فرصة وجود العرق ووجود البكتريا في كل مكان.
2. ارتداء ملابس قطنية، وغير ضيقة لمنع حدوث العرق.
3. تغيير الملابس الداخلية مرتين يوميا أفضل لصحة جسمك!

جلسات التقشير

عرايس كتير بيهتموا بعمل تقشير في عيادات تجميل، والتجربة بتكون ناجحة، ولكن زي ما فيه مميزات فيه عيوب لازم نقولها ليكي، وهي أن المنطقة بترجع تسمر مرة أخرى بعد 6 شهور تقريبا بسبب زيادة إفراز مادة الميلانين زي ما وضحنا في البداية.

وهم استخدام الزيوت العطرية في التفتيح!

بلاش تستخدمي الزيوت العطرية والطبيعية للتفتيح، وخصوصا أن الخلطات دي بتكون منتشرة على الانترنت لأنها ممكن تسبب تهيّج شديد في الجلد والتهابات أيضا.

نصيحة ذهبية!

اتكلمنا عن علاجات كتيرة جدا للمناطق الخاصة، واللي ممكن تجربي جزء منهم أو تجربيهم كلهم بس، ولكن المهم ثقتك في نفسك، وأنك تكوني مدركة وعارفة أن المناطق دي لها طبيعة خاصة بيها ومحتاجة عناية بشكل معين، وده حيساعدك على تقبّل نفسك وشكل ولون جسمك أيضا!

اقرأ أيضا: من أجل تجهيزات الفرح.. 10 نصائح تجميلية وصحية للعريس.