تنضيف البيت بالطاقة … خطوات سهلة لبيت جديد مليان حيوية

تنضيف البيت بالطاقة يمكن جملة سمعتوها في برامج التلفزيون وفيديوهات السوشيال ميديا لكن مركزتوش معاها أوي.

الحقيقة إن أهم حاجة في أي مكان بندخله أو نقعد فيه ان تكون طاقته نضيفة وإيجابية.

ده اللي بيخلينا نحس بالانتعاش في المكان.

وأكيد لاحظتم في بعض الأوقات إنكم ممكن تدخلوا مكان جديد بتروحوه لأول مرة بس تحسوا قلبكم مقبوض ومش طايقين المكان ولا القعدة فيه.

وده غالباً بيحصل لما المكان تكون طاقته سلبية ومش نضيفة؛ فبالتالي بتأثر بالسلب على الناس اللي فيه.

وأكيد إنتم مش حابين إن ده يحصل في بيتكم سواء ليكم أو للناس اللي هتيجي تزوركم في أي وقت.

وبما إنكم خلاص خلصتم تجهيز بيتكم من دهانات وتركيب إضاءات وفرش العفش، وخلاص المظهر الخارجي اللي كنتم عايزينه كمل.

اتبقت دلوقتي أهم خطوة عشان البيت يبقى بيت حقيقي، ألا وهي التطهير النشط.

فزي ما تجديد المكان عشان يبقى بيتكم الجديد بيزيل آثار الناس اللي سبقوكم في المكان من تركيبات قديمة وتصليح للمشاكل اللي سابوها في بنية البيت.

فالتطهير النشط ده هيساعدكم تتخلصوا من أي ركود متبقي من الطاقة القديمة اللي ممكن تبقى لسة متعلقة في المكان.

وكمان طاقة ضغوط البناء والتجديدات اللي عملتوها وانتم بتجهزوا البيت.

وعلى الرغم من إن فكرة تنضيف البيت بالطاقة ممكن تبان غامضة ومش مفهومة، إلا إن في الحقيقة هي بتشمل ممارسات كتير متجذرة في الثقافة الشعبية.

وكانوا جداتنا والستات الكبار بيعملوها بطريقة فطرية وهم بينضفوا من غير ما يدركوا تفاصيل علوم الطاقة دي.

وعادة المهمة مش هتتطلب أكتر من أدوات منزلية بسيطة على الأغلب هتكون موجودة في مطبخكم.

فتعالوا معانا رحلة في المقال ده نتعلم مع بعض خطوة خطوة إزاي نتخلص من الطاقة السلبية في بيوتنا.

وندخل الطاقة الإيجابية للبيت ولحياتنا كلها.

تهوية البيت:

أبسط طريقة في تنضيف البيت بالطاقة هي إننا نفتح الأبواب والشبابيك.

ونخلي الهواء الراكد يخرج برة وندخل بداله هواء جديد نقي، وحتى لو الجو برد ممكن تعملوا ده إن شاء الله حتى لخمس دقايق بس.

واكنسوا الأرضية أو امسحوها من أقصى نقطة في المنزل لحد اتجاه الباب الأمامي.

ده هيخليكم تطردوا الطاقة السلبية اللي بتكون عالقة في التراب المتراكم والأوساخ لبرة باب بيتكم.

تنضيف البيت بالطاقة من المدخل:

مدخل بيتكم هو المكان الأساسي المسئول عن تصفية الطاقة اللي داخلة لكم، وده يخليه أول مكان لازم تبدأوا بتطهيره.

اعملوا غسول بسيط من الملح بإنكم تدوبوه في مية دافية.

وده لإن الملح بخصائصه الطبيعية المنقية بتساعد على تدويب الطاقة السلبية فعلاً خلال التنضيف.

فامسحوا عتبة بيتكم وإطار الباب بالغسول ده، وتخيلوا إنكم كدة بتعملوا حاجز مش متشاف بيرحب بالطاقة الإيجابية ويصد الطاقة السلبية.

وعشان تزودوا الحماية حطوا كوباية صغيرة من مية اللمون الطازة جنب المدخل؛ فدايماً الحمضيات بتستخدم في التخلص من الطاقات التقيلة.

وده زي ما بتقدر تتخلص من دهون المطبخ كدة، وغيروا الكوباية دي كل يوم، وارموا المية اللي فيها برة بيتكم.

وتخيلوا إنها كدة بتمتص كل الطاقة السلبية وتطردها برة، وكمان لو عندكم سجادة ترحيب على عتبة الباب نفضوها برة.

وتخيلوا برضه إنها كدة بتتخلص من الطاقة السلبية القديمة وبترحب بالطاقة الإيجابية الجديدة.

تطهير أوض المعيشة:

غالباً المساحات اللي بنقعد فيها لأوقات طويلة زي أوض الليفينج والصالون وأوض النوم بتكون هي أكتر الأماكن اللي بتمتص الطاقة السلبية.

وعشان كدة في تنضيف البيت بالطاقة لازم نهتم بتطهيرها هي أكتر حاجة.

وده نقدر نعمله بإننا نحضر رذاذ منقي يبقى فيه من عناصر الطبيعة في إزازة رشاش.

الرذاذ ده بيتكون من مية مخلوطة مع خل أبيض وعصير لمون وعشب إكليل الجبل، ونرش منه على العفش ونمسحه.

والمسح ده بيكون بطريقة دائرية في اتجاه عقارب الساعة، وبالليل ممكن نحط كوبايات صغيرة من الملح في زوايا الأوض.

والصبح نرمي الملح ده بره بيتنا خالص منغسلوش في المطبخ ولا الحمام.

لإنه كدة بقى مليان بالطاقة السلبية اللي ممكن يسبها لنا.

الاهتمام بالمطبخ في تنضيف البيت بالطاقة:

المطبخ من أكتر الأماكن اللي تستاهل الاهتمام بتطهيرها طاقياً في البيت، وده لإنه المكان اللي بيتحضر فيه الأكل.

وبالتالي طاقته بتأثر على طاقة الأكل اللي بيتحضر فيه، وبالتالي صحة وطاقة اللي هياكلوه.

وعشان كدة تقدروا تطهروا مطبخكم بإنكم تجيبوا أكبر حلة عندكم وتملوها مية.

وتحطوا فيها شرايح لمون مع خل أبيض وأغصان من عشب إكليل الجبل الطازة، وتحطوها تغلي على النار.

وبعدين توطوا النار عليها، وتسيبوا البخار اللي طالع منها هو اللي ينقي الهوا ويطرد الطاقة السلبية في المكان.

وفي النهاية حطوا كوباية صغيرة فيها أعشاب طازة زي الريحان أو النعناع أو إكليل الجبل على سور شباك المطبخ.

الأعشاب دي هتنقي الجو من الطاقة السلبية وتجيب لكم الطاقة الإيجابية خصوصاً مع روايحها العطرية المنعشة.

وفي نهاية المقال نتمنى إننا نكون فدناكم وعرفناكم طرق تنضيف البيت بالطاقة اللي تساعدك تحافظوا على نضافة بيتكم وإيجابيته.

ونتمنى لكم بداية حياة زوجية سعيدة مليانة طاقة إيجابية وسعادة وفرح وهنا وحب أبدي.