تحضير شنطة يوم الفرح للعروسة بالتفصيل

تحضير شنطة يوم الفرح قبل الفرح ضروري سواء كنتي هتستعدي للفرح في بيوتي سنتر أو فندق أو غرفة في القاعة فلازم يبقى معاكي كل احتياجاتك. وهنكتبلهاك بالتفصيل وكل اللي عليكي تنقلي التفاصيل دي على موبايلك أو في نوت. عشان تحددي اللي خلصتيه واللي لسه هتحضريه.

المفروض إنك قبل يوم الفرح تكوني ركزتي في كل تجهيزات العروسة يوم الفرح من اختيار لمكان الزفاف والميكب أرتست والفوتوجرافر، وطبعًا اهتميتي بنفسك كما يجب بكل تجهيزات العروسة قبل الفرح بشهرين.

مش هيبقى باقي غير تحضير شنطة يوم الفرح وتبقي خلصتي كل حاجة. وضروري تحضري الشنطة قبل الفرح بأسبوع على الأقل. عشان كل ما الفرح هيقرب هتنسي التحضيرات وهتقع منك حاجات كتير.

أساسيات تحضير شنطة يوم الفرح للعروسة

من أكتر الحاجات اللي بتوتر العروسة قبل الفرح تحضير شنطة يوم الفرح أو شنطة شهر العسل. أو أي تحضيرات فيها تفاصيل كتيرة ممكن يتنسي منها حاجة. ورغم إنها أميرة اليوم وأهم شخص فيه إلا إنها من توترها مش بتحس بتميزها. وهنا هتلاقي كل تفاصيل تحتاجيها واللي هتلغي توترك.

أولًا: الفستان والطرحة

الفستان رغم إنه آخر حاجة هتخديها للفندق لكن هيكون في بالك من قبل الفرح عشان البروفة وتتأكدي من كل تفاصيله. يعني لو محجبة تتأكدي إن الأكمام تمام ومظبوطة عليكي، والطرحة بالتطريز اللي اتفقتي عليه.

ثانيًا: الاكسسوارات والهيد بيس

طبعًا إنتي كدا اخترتي الاكسسوارات والهيد بيس المناسبة مع ستايل فستانك ومع شكلك. بس قبل ما تحطيها في الشنطة هتحطيها في بوكس قوي عشان مع أي خبطة الاكسسوارات متتأثرش.

ثالثًا: الملابس البديلة وقت المكياج

على حسب ما إنتي مجهزة نفسك سواء هتتصوري وقت المكياج أو بعده لازم يكون معاكي لبس خاص وقت المكياج. ولما تخلصي تلبسي الروب الستان عشان ميبقعش أو يحصله حاجة وتزعلي عليه. آخر حاجة عايزينها إنك تزعلي من أي حاجة في اليوم دا.

رابعًا: ملابس أصحاب العروسة

لو أصحابك هيبقو معاكي في الفندق ضروري وقت تحضير شنطة يوم الفرح تكوني محضرة الروب اللي هيلبسوه معاكي. بحيث يوم الفرح محدش ينسى الروب بتاعه والسيشن يبوظ.

خامسًا: ملابس مريحة

لو كنتي هتقضي وقت طويل في الفندق فالأكيد راحتك أهم من كل شيء، تاخدي معاكي بيجامة قطن مريحة تقعدي بيها. وممكن لو في وقت تريحي شوية وتنامي دا هيفيدك إنك تبقي فايقة باقي اليوم.

وطبعًا الملابس الداخلية اللي هتتلبس مع الفستان، وتكون قطن وناعمة ومريحة عشان مع الحركة متسببش مشكلة.

إضافات تحضير شنطة يوم الفرح للعروسة

مستحضرات ضرورية للعروسة عند تحضير شنطة يوم الفرح للعروسة

في بنات كتير فاكرين إن تحضير شنطة يوم الفرح للعروسة بيكون مش ضروري وبيجي في بالهم إنهم مش هينسو حاجة. إحنا هنا مش بنتكلم على الأساسيات بس، لا كمان بنشوف إيه الحاجات اللي بنات احتاجتها يوم الفرح وللأسف مكانتش عاملة حسابها، وزي ما قولنا في الأول مش عايزين أي توتر فمش هنسيب تفصيلة واحدة للصدفة.

أولًا: ملابس داخلية اضافية

بخلاف الملابس الداخلية اللي هتتلبس تحت الفستان لازم يكون معاكي طقم تاني احتياطي للفستان، دا غير طقم تاني وقت المكياج. ممكن حاجة تقع عليكي وهيكون صعب تتصرفي فلازم يكون معاكي بدايل.

ثانيًا: سيشوار ومكواة شعر

تحسبًا لأي ظرف طارئ وإن الميكب أرتست تكون مش هتعمل شعرك، أو السيشوار والمكواة اللي معاها حصلهم حاجة. عشان كدا احتياطي يكون معانا سيشوار ومكواة ناخدهم معانا.

ثالثًا: مستحضرات العناية بالبشرة والشعر

لإنك ممكن تاخدي شاور قبل الاستعداد فيكون معاكي كل اللوازم بتاعتك، وطبعًا يكون معاكي بعض المكياج اللي بتحبيه عشان لو حبيتي توصفي للميكب أرتست اللون اللي إنتي عايزاه.

بدايل مش هتتخيلي إنك هتحتاجيها يوم الفرح

تحضير شنطة يوم الفرح للعروسة مش بس بيقتصر على الفستان والاكسسوارات والتفاصيل الجميلة دي، في تفاصيل تانية هتندمي جدًا لو مكانتش معاكي يوم الفرح خاصة لو حصل حاجة واحتاجتيها، عشان كدا هنركز إننا مننساش حاجة.

كوتشي أو جزمة بيضاء إضافية

سواء كنتي هتلبسي كوتشي أو جزمة ضروري تاخدي كوتشي احتياطي معاكي، لإن ممكن مع الحركة ممكن اللون الأبيض يتغير، أو رجلك توجعك لو الكوتشي أو الجزمة ضيقة فبدل ما تفضلي متضايقة طول الفرح الأفضل يكون معاكي حاجة مريحة احتياطي.

شرابات نايلون وقطن

لو هتلبسي كوتشي يبقى أكيد تاخدي شرابات قطن زيادة معاكي ممكن من كتر الحركة الشراب يعرق وتحتاجي تغيريه عشان لما ترجعي الشقة ريحة الكوتشي متبقاش غريبة.

ولو هتلبسي جزمة ضروري تلبسي شراب نايلون حتى لو شفاف لإنه هيحمي رجلك إنها تتجرح، وأكيد هتحتاجي تغيريه برضو مرة على الأقل بعد السيشن.

حاجات بسيطة وضرورية في تحضير شنطة يوم الفرح للعروسة

ومن أهم أساسيات تحضير يوم الفرح للعروسة وتجهيزات شنطة شهر العسل إننا نجهز شنطة صغيرة فيها مجموعة من الأدوات بحيث تبقى مُجمعة في مكان واحد نقدر ننقلها بسهولة من شنطة لشنطة.

التجهيزات دي هي “فوط صحية، خيط أسنان، ودانة، كريم ترطيب، واقي شمس، خيط وإبرة، فرشاة أسنان ومعجون، وايبس، مناديل ورقية”.

هتحسي بعد التفاصيل دي كلها إن تحضير يوم الفرح للعروسة موضوع متعب، لكن كل لما يومك المميز يعدي من غير توتر هتحسي إن كل مجهود عملتيه كان ضروري.

هل محتوى المقال دة كان مفيد بالنسبة لك؟

نعم، مفيد!لا!