ازاى تختاري الصبغة المناسبة لنوع شعرك؟

كل بنت بتبقى عايزة تكون في أجمل صورة وهي عروسة. وفيه عرايس كتير بيفكروا قبل الفرح أصبغ شعري ولا لأ؟.. طب دة ممكن يأثر على شعري ازاى؟ النهاردة هنقولك شوية معلومات عن الصبغة، وازاي تختاري نوع كويس ومناسب لشعرك.

ازاي بتأثر الصبغة على لون الشعر؟

الصبغة بتأثر على لون الشعر الأصلى وهو (الميلانين)، وبتتماسك بطبقات الشعر بروابط لمدة معينة، ودة على حسب النوع المستخدم.

انواع صبغة الشعر

صبغة الشعر بتتقسم ل 3 أنواع، ودة على حسب مدى ثباتها:

صبغة دائمة

 ودي بيتم فيها إزالة لون الشعر الأصلي، واللون مش بيختفي إلا بعد مدة طويلة لأنه بيثبت في طبقة الشعر الوسطى واسمها cortex، والنوع دة بيحتوي على الأمونيا وهي سبب ثبات لون الصبغة على طبقات الشعر أيضا.

صبغة شبه دائمة

 وبتبدأ تختفي من الشعر بعد 24 غسلة للشعر أو استخدام الشامبو المدة دي، وهي بتعمل غلاف على الشعر أو coating، ولا تحتوي على أمونيا. 

صبغة مؤقتة

وهي أقلهم ثباتًا، وتثبت لمدة 8 غسلات فقط للشعر أو أقل، ولا تحتوي على أمونيا أيضا.

والنوع الثاني والثالث بترتبط فيه بطبقة الشعر الخارجية واسمها cuticle، ودة اللي بيخليها مش ثابتة.

العوامل المؤثرة على الثبات في الشعر

• اللون الأصلي للشعر: يعني شعرك لو فاتح بيظهر عليه الصبغة بسهولة، ولو غامق بتعملي الأول سحب للون الشعر وبعدين بتصبغي شعرك، ودة بياخد وقت شوية عن الشعر الفاتح.

• هل شعرك مصبوغ قبل كدة ولا لأ؟ ولو مصبوغ ولسا اللون ثابت عليه بتعملي سحب للون الأول، وفيه خبراء بيقولوا أن ممكن عملية سحب اللون تاخد جلستين من شدة ثبات اللون الأول على الشعر.

 نصيحة مهمة

لازم تستني على الأقل من شهر لشهر ونص لو حابة تصبغي شعرك مرة أخرى؛ وده لأن الشعر ممكن يحصل فيه تلف ويتأثر بشكل كبير.

ايه علاقة درجة اللون اللي هتختاريه ومدى ثباته؟

الخبراء بيقولوا أن الأفضل تختاري لون سواء أغمق أو أفتح من لون شعرك بمقدار 3 درجات لتحقيق نتيجة أحسن.

فوائد البلسم مع الصبغة

في براندات كتير بيحطوا بلسم مع الصبغة ودة لعدة أسباب:

• حماية الشعر من التلف بسبب حرارة الشمس أو السشوار أو البيبي ليس أو الماية.
• يجعل الطبقة الخارجية للشعر cuticle أكثر نعومة.
• استعادة الشعر لترطيبه.

الأمونيا في صبغة الشعر

الأمونيا من المكونات الرئيسية، ولكن عليها جدل كبير إذا كانت مفيدة للشعر أو لأ، وده لأنها تسبب تلفًا في الشعر.

فائدة الأمونيا

تجعل الصبغة ثابتة أكثر في طبقات الشعر المختلفة.

عيوب الأمونيا

• الخبراء يطلقون عليها مرض للشعر؛ لأنها تسبب تلف وهيشان وتساقط للشعر.
• تدمر طبقات الشعر سواء الخارجية cuticle أو المتوسطة cortex.
• لو قررتي أنك تستخدمي نوع فيه أمونيا في أوقات متقاربة وتركيز عالي ده يؤدي لدخول الأمونيا للجسم عن طريق فروة الرأس وممكن تأثر على الرئة والعين، ولكنها حالات نادرة.
• تؤثر على مادة اسمها tyrosine وهو من أنواع البروتينات، والمسؤول عن استعادة الشعر للميلانين مرة أخرى.

نصائح للحفاظ على لون الصبغة

1. ابعدي عن أشعة الشمس؛ لأنها عدو الصبغة بسبب الأشعة فوق البنفسجية.
2. تجنبي ماء البحر وماء حمام السباحة بقدر الإمكان؛ لاحتوائهم على الأملاح والكلور بتركيز عالي.
3.  استخدمي زيوت حماية زي زيت الأرجان وزيت اللوز وزيت الجوجوبا.
4. اغسلي شعرك بماء بارد cool water.
5. استخدمي شامبو وبلسم مخصص للشعر الملون ودة لأن فيهم مواد مرطبة عالية.

تحذيرات عند الاستخدام

• جربي جزء صغير على جلدك على سبيل المثال إيدك ولو حصل احمرار أو حكة بلاش تستخدميها.
• لو عندك جرح في فروة رأسك استني شوية لما يلتئم.
• استخدمي اسبراي حماية من الشمس ومن البيبي ليس على سبيل المثال:

    1-  Eva Sun & Sea Hair Spray Protection. 

     2-Clary Hair Mist.

• لازم تغسلي فروة رأسك جيدًا بعد الاستخدام.
• اختاري مكان موثوق لو قررتي تصبغي شعرك في البيوتي سنتر.
• في حالة الحمل والرضاعة: الأفضل استشارة الطبيب.

اقرأ أيضا: الشعر التالف.. أسبابه.. وطرق العناية به.