أفضل نصائح لاختيار بدلة الفرح

في وقت الكل مركز فيه على فستان العروسة. العريس أوقات بيتنسي وسط دوشة التجهيزات ودي أكبر غلطة. لأنك كعريس بدلتك هي انعكاس لشخصيتك وهيبك في ليلة الفرح. عشان كدا لما تختار البدلة الصح مش بس بتكمل الصورة. لكن كمان بتحس بثقة وراحة في أهم يوم في حياتك. والاختيار الصح مش بس في اللون أو المقاس. لكن في كل تفصيلة صغيرة بتفرق جامد في اللوك النهائي. فتعالى نغوص مع بعض في دليل متكامل فيه أفضل نصائح لاختيار بدلة الفرح خطوة بخطوة، علشان تبقى جاهز يوم الفرح زي الملوك.

أفضل نصائح لاختيار بدلة الفرح المميزة

للأسف اهتمام العرسان ببدلة الفرح بيكون قليل. لدرجة أن مفيش أي نسبة مقارنة بينه وبين اهتمام العروسة، ودا بيرجع للضغوط النفسية على العريس قبل الفرح. أو لأنه فاكر أن تفاصيل البدلة مش هيكون ليها تأثير. لكن دا تفكير غلط. ومهم جداً أننا نركز ونوفر الاهتمام والوقت الكفاية للبدلة، ودلوقتي هنساعدكم ونعرفكم في الفقرات الجاية أفضل نصائح لاختيار بدلة الفرح.

١-قبل أي حاجة حدد ستايلك الشخصي

أول خطوة اسأل نفسك: “أنا بحب الكلاسيكي ولا المودرن؟ بحب ألبس سليم فيت ولا مريح شوية؟”. لأن هنا إجابتك هتحدد الطريق كله. مثلاً في عرسان بيحبوا البدلة السودا التقليدية. وفي اللي بيختاروا الرمادي أو النبيتي علشان يبقوا مختلفين. كمان خد بالك من وقت الفرح. يعني لو بالنهار اختار لون فاتح، ولو بالليل ممكن تروح على لون أغمق ورصين هيكون مناسب وشيك أكتر.

بدلة الزفاف

٢-التفصيل والمقاس دول اللي هيظهروا شياكتك بجد

المقاس هو اللي هيخلي البدلة تبان عليك ملوكي وشيك جداً. أو للأسف تبان أنها أي كلام. فعشان كدا خليك حريص إنها تكون مفصلة على جسمك بالضبط لا أوسع ولا أضيق. وجرّب أكتر من موديل سليم، كلاسيك، أو حتى دابل بريست. وحاول تستعين بخياط محترف لو اشتريت بدلة جاهزة وعايز تعدّلها ضروري تراجع واعمِل بروفة أخيرة قبل الفرح بأسبوع. واتأكد أنك عارف تتحرك وتمشي وترقص بيها. وإلا ممكن تكتشف أنك متكتف بسبب أن البدلة ضيقة أو تفاصيلها مش مظبوطة.

تصميمات بدلة العريس

٣-خامة القماش مش بس منظر، دي راحة كمان

محدش بيحب يعرق أو يحس إنه مكتّف طول الفرح، علشان كده خامة القماش مهمة جداً. وضروري في الصيف حاول تروح على الكتان أو الصوف الخفيف أو حتى الخامات اللي فيها قطن. أما في الشتاء فالصوف التقيل أو المخمل بيدي دفا وأناقة. ودايمًا وأنت بتدور وبتقارن ألمس القماش وشوف إحساسه على جسمك. وخلي بالك من الخامات اللي فيها قطن. وكمان خلي بالك من الجودة لأنها هتفرق في راحتك.

٤-جرّب ألوان برا الصندوق بس بزوق

البدل السودا والكحلي هي أكتر ألوان مضمونة وشيك، لكن في نفس الوقت هم اختيارات تقليدية ومنتشرة، عشان كدا لو عايز تسيب بصمتك جرّب الألوان الجديدة زي الزيتي أو ممكن مثلاً الرمادي الفاتح، أو حتى البدلة البيج في كافيه أو أبيض. وخليك عارف أن السر إنك توازن اللون مع القميص والكرافتة.. ولو عروستك لابسة أبيض بالكامل، اختار لون يبان حلو جنبها في الصور

٥-الإكسسوارات والتفاصيل الصغيرة اللي بتكمل الصورة

الكرافتة أو الببيونة لازم تناسب شكل وشك واستايل بدلتك. كمان مناديل الجيب (Pocket Square) بتضيف لمسة أناقة واضحة. وإوعى تنسى الدبلة، ودبوس البدلة لو حابب تضيف شياكة أكتر. والجزمة كمان لازم تكون جلد طبيعي ومهم يكون لونها متناسق، ومريحة لأنك هتلبسها وقت طويل جداً.

أماكن بيع بدلة الفرح

٦-التناسق مع العروسة سر الصورة المثالية

عرسان كتير فاهمة أن التنسيق تنسيق ألوان وبس. لكن مش شرط تبقوا لابسين نفس اللون، بس لازم تبقوا ماشين على نفس الخط. يعني لو العروسة اختارت طابع كلاسيك ناعم، متلبسش بدلة مودرن فيها ببيونة فاقعة مثلاً. وضروري تتكلم معاها عن اللوك اللي ناوية عليه، وخلوا المصور يساعدكم تتخيلوا الشكل النهائي في الصور.وممكن كمان تجربوا اللوك في البروفة دا بيكون أفضل.

٧-جرّب البدلة كاملة أكتر من مرة

أول مرة تلبس البدلة ماينفعش تكون قبل الفرح بساعتين! خصص وقت تلبسها فيها مع الجزمة والإكسسوارات وتتحرك، تشوف راحتك، تقعد، ترقص، وتمشي بيها. لأن الحركات البسيطة دي هتخليك تكتشف مشاكل في البنطلون أو ضيق في الجاكيت قبل فوات الأوان. وممكن لو حسيت إنها محتاجة تعديل، تلحق الوقت قبل ما تندم وتفوت الاستمتاع بأجمل يوم في العمر.

٨-الشياكة مش في السعر لكن في الذوق والراحة

لازم نعرف أن بدلة تمنها غالي مش دايمًا معناها إنها الأفضل. لأن ممكن تلاقي بدل تفصيل شيك جدًا وبسعر أقل، المهم إنها تناسب جسمك وتليق على المناسبة. أما لو هتأجر اختار مكان ليه سمعة كويسة واطلب تعديل المقاس. ولو هتشتري خليك ذكي واختار موديل تقدر تلبسه تاني في مناسبات تانية.