أدوات تخطيط الفرح مع إيجي ويدنج
أدوات تخطيط الفرح حاجة مهمة جداً تكون معاكم من أول لحظة بتفكروا فيها في فرحكم عشان توضح لكم كل المهام اللي عليكم تنفذوها.
وكمان تحدد لكم مواعيد كل مهمة في فرحكم واللي تقدروا خلال الميعاد ده إنكم تبدأوا في المهمة أو تنتهوا منها.
احنا اتكلمنا في المقالات اللي قبل كدة عن تفاصيل كتير لكل مرحلة في التخطيط لفرحكم واختياراتكم لكل حاجة.
بس عشان نسهلها عليكم أكتر احنا عملنا صفحة خاصة على منصتنا إيجي ويدنج توضح لكم كل خطوة بتفاصيلها.
وكل اللي عليكم تعملوه إنكم تسجلوا على المنصة حساب ليكم وتدخلوا على صفحة مهام التخطيط، وتحطوا تاريخ فرحكم.
وخلال ثواني المنصة هتظهر لكم جدول متكامل لكل المهام اللي عليكم تنفذوها بخطواتها التفصيلية.
وده كمان مع إضافة المدة الزمنية اللي المفروض تكونوا أنجزتوا المهمة دي فيها قبل ميعاد فرحكم.
والجدول ده بيتيح ليكم كمان انكم تعلموا على كل مهمة أو خطوة نفذتوها.
ويعرفكم إنتم خلصتم نسبة كام من المهام المطلوبة منكم.
وده طبعاً بيساعدكم في تخفيف الضغط من عليكم، وانكم تحسوا بالإنجاز، وان في خطوات حقيقية أخدتوها وخلصتوا في التجهيز لفرحكم.
وفي المقال ده هنعرفكم بالتفصيل ايه هي الخطوات والمهام اللي المفروض تخلصوها حسب الجدول واحدة واحدة.
فتابعوا معانا المقال.
اختيار وحجز القاعة أول خطوة في أدوات تخطيط الفرح:
أول حاجة لازم تفكروا فيها بعد ما تقرروا ميعاد فرحكم هي تفاصيل اختيار وحجز القاعة.
عشان كدة دي أول خطوة عندنا، والخطوة دي متقسمة لخطوات فرعية تساعدكم في التخطيط واختيار المكان المناسب لفرحكم.
زي إنكم تحسبوا العدد التقريبي للضيوف اللي هتعزموهم، وتحددوا وقت فرحكم هيكون بالنهار ولا بالليل.
بعد كدة تحددوا قايمة بالقاعات المناسبة ليكم من حيث مكانها وميزانيتكم.
وتبدأوا تزوروا القاعات دي في نفس الميعاد اللي هيكون فيه فرحكم.
وده عشان تتأكدوا من تفاصيلها في الميعاد ده ومناسبتها ليه، وتتأكدوا من جودة الصوت والإضاءة فيها.
ولازم تراجعوا وتجربوا كل حاجة قبل الاتفاق النهائي سواء الديكور وشاشات العرض والدي جيه وأماكن التصوير.
وكمان لازم تدوقوا عينات الأكل لو كانت الوجبات هتتحضر من إدارة القاعة ومش هتتفقوا مع حد تاني من برة.
وبرضه تتأكدوا من إمكانية إضافة وجبات أو كراسي في الحالات الطارئة لو حصل وعدد الضيوف زاد عن حساباتكم.
وقبل ما تمضوا العقد لازم تكونوا متفقين على كل حاجة من السعر وشروط التأجيل أو الإلغاء.
واتأكدوا إن العقد يكون مختوم عشان تحفظوا حقوقكم، وبعد ما تمضوا وتدفعوا العربون لازم تحتفظوا بالوصل معاكم.
وكمان لازم يكون معاكم رقم مدير القاعة عشان تقدروا تنسقوا معاه كل التفاصيل الجاية لحد آخر لحظة في فرحكم.
حجز شهر العسل:
تاني خطوة في أدوات تخطيط الفرح على منصتنا هي حجز شهر العسل، للأسف أغلب العرسان بيأجلوا الخطوة دي.
وده على اعتبار إنها آخر حاجة هيعملوها أصلاً بعد فرحهم ولسة بدري عليها، بس الحقيقة إن الخطوة دي لو متجهزلهاش من بدري مش هتلحقوا تعملوها في الآخر.
سواء كنتم هتقضوا شهر عسلكم جوة مصر أو براها؛ فانتم هتحتاجوا تحجزوا وسيلة السفر والفندق اللي هتقعدوا فيه.
والحجات دي خصوصاً لو في ضغط موسم مش هتلاقوا لها حجز، عشان كدة لازم تبدأوا حجوزاتكم من بدري على الأقل قبل الفرح بست شهور إن مكنش أكتر.
ده غير إنكم ممكن تحتاجوا تجددوا جوازات سفركم وتاخدوا وقت في استخراج الفيز والتطعيمات لو هتسافروا برة مصر.
مهام قبل فرحكم بخمس شهور في أدوات تخطيط الفرح:
لو القاعة مبتوفرش أي خدمة من الخدمات اللي ممكن تحتاجوها في فرحكم زي الدي جيه أو فرقة الزفة أو تقديم الأكل أو التصوير.
أو أي خدمات تانية انتم محتاجينها للفرح زي مكياج العروسة أو أي تفاصيل زيادة؛ فانتم لازم تكونوا محددين التفاصيل دي قبل فرحكم بخمس شهور على الأقل.
وتدوروا على أفضل الأشخاص اللي يقدروا يقوموا بالمهمات دي وتمضوا معاهم عقود واضحة بكل التفاصيل.
وكل التفاصيل المرتبطة بالمهام دي هتلاقوها واضحة على المنصة عشان تقدروا تعلموا براحتكم على اللي نفذتوها منها وكمان تقدروا تلغوا منها اللي ميناسبكمش.
قبل الفرح بأربع شهور:
طبعاً العروسة بيكون عندها تفاصيل ملهاش أول من آخر، عشان كدة من أدوات تخطيط الفرح إننا نهتم بالتفاصيل دي.
ولإن أهم حاجة لأي عروسة في فرحها هو مظهرها؛ فالفستان والميك أب هم الخطوتين الأساسيتين في الفترة دي.
عشان كدة هتلاقوا على المنصة كل تفصيلة تخص اختيار الفستان واكسسواراته والاتفاق مع الميك أب أرتيست والحاجات اللي تتكلمي فيها معاها.
وبكدة تكوني خلصتي من ضغط كل التفاصيل دي قبل فرحك بمدة كافية وتقدري تستعدي لليلة الكبيرة بذهن صافي.
أدوات تخطيط الفرح للعريس:
ولإن الرجالة عادة معندهمش تفاصيل كتير زي الستات؛ فالعريس يقدر يجهز تفاصيل بدلته وإكسسواراته قبل الفرح بأقل من شهرين.
وهتلاقي على منصتنا كل التفاصيل المتعلقة باختياراتك المختلفة، وايه اللي هتحتاج تفتكره وانت بتظبط نفسك ومظهرك ليوم فرحك.
وطبعاً انت هتكون المسئول برضه عن الاتفاق مع المأذون وتخليص الأوراق الرسمية.
عشان كدة هتلاقي برضه الخطوات اللي لازم تاخدها في الموضوع ده بالتفصيل بحيث تكون كل حاجة جاهزة قبل الفرح بأكتر من شهر.
وبكدة ميكونش فيه أي حاجة ممكن تقلقك أو توترك قبل الفرح ويفضل بالك رايق ومستعد لفرحتك الكبيرة.
قبل الفرح بشهر:
خلاص الميعاد أزف وفاضل كام خطوة بسيطة على الليلة الكبيرة، وعشان كدة هتلاقوا في أدوات تخطيط الفرح على منصتنا الخطوات الأخيرة في إعلان فرحكم.
أول حاجة لازم تعملوها في الوقت ده هو التأكد من دعوة كل المعازيم، وهتلاقوا تفاصيل كل خطوة في المهمة دي على المنصة عشان متنسوش حد.
ده غير حجوزات التنقلات والزفة وانكم تتأكدوا ان كل المعازيم عرفوا اللوكيشن صح، وكمان الخطوات الخاصة بيكم في آخر أيام الشهر.
المهمات عندنا مش بتعتمد بس على التحضير للفرح نفسه وبس، لا كمان تحضيركم انتم للفرح عشان يبقى أحلى يوم في حياتكم.
عشان كدة هتلاقوا خطوات تساعدكم في تأهيل نفسكم جسدياً وذهنياً لليوم ده، ونحاول نوصل بيكم لمرحلة الاسترخاء بعيد عن الضغط والتوتر.
أدوات تخطيط الفرح قبل أيام منه:
آخر يومين قبل فرحكم طبعاً هيكونوا لليلة الحنة والاستعداد للفرح، عشان كدة هتلاقوا على منصتنا خطوات تفصيلية تتأكدوا بيها من حجز كل حاجة لليلة الحنة.
وده عشان الليلة دي تكون من أسعد ذكرياتكم قبل فرحكم، خصوصاً إن فيه أسر كتير وبالذات في الصعيد بتهتم بليلة الحنة أكتر من اهتمامهم بالفرح نفسه.
أما اليوم الأخير قبل فرحكم فلازم تتأكدوا فيه ان كل تفاصيل بكرة هتكون تمام، عشان كدة حطينالم قايمة مهام تنجزوها في اليوم ده.
ومنسناش كمان في المهام دي إنكم لازم تاخدوا بالكم من نفسكم عشان تكونوا فايقين ورايقين بكرة وانتم في فرحكم وتقدروا تستمتعوا بيه.
وبكدة نكون حطينا لكم مهام تفصيلية لكل لحظة من لحظات تجهيزكم لفرحكم في أدوات تخطيط الفرح على منصتنا إيجي ويدنج.
وكمان متاح ليكم انكم تلغوا أي مهمة مش مناسبة ليكم أو تضيفوا مهمة حابين تفكروا نفسكم بيها وشايفين إنها مش موجودة في جدولنا.
وفي النهاية نتمنى لكم فرح سعيد ومن دواعي سرورنا لو كنا سبب في إن اليوم ده يمر عليكم بسهولة ويفضل أحلى ذكرى ليكم في حياتكم.
هل محتوى المقال دة كان مفيد بالنسبة لك؟
نعم، مفيد!لا!
